काठमाडौं, २६ जेठ । विश्वभरका फुटबल प्रेमीहरूको प्रतिक्षाको घडी अब अन्त्यतिर पुगेको छ। फुटबलको सबैभन्दा ठूलो प्रतियोगिता मानिने फिफा विश्वकपको २३औं संस्करण आगामी जुन ११ देखि उत्तर अमेरिकामा सुरु हुँदैछ। अमेरिका, मेक्सिको र क्यानडाले संयुक्त रूपमा आयोजना गर्न लागेको यस संस्करणलाई विश्वकप इतिहासकै सबैभन्दा ठूलो र भव्य प्रतियोगिताका रूपमा हेरिएको छ।
यसपटकको विश्वकपमा पहिलो पटक ४८ राष्ट्र सहभागी हुँदैछन् भने कुल १०४ खेल खेलाइनेछन्। यसअघि ३२ टोलीबीच हुने प्रतियोगिता अब विस्तारित स्वरूपमा आयोजना हुन लागेको हो। प्रतियोगिता करिब ४० दिनसम्म चल्नेछ र जुलाई १९ मा अमेरिकाको न्यूयोर्क/न्यूजर्सीस्थित मेटलाइफ स्टेडियममा हुने फाइनल खेलसँगै समापन हुनेछ।
विश्वकपको उद्घाटन खेल जुन ११ मा मेक्सिको सिटीको ऐतिहासिक एज्टेका स्टेडियममा हुनेछ, जहाँ आयोजक राष्ट्र मेक्सिकोले दक्षिण अफ्रिकाको सामना गर्नेछ। यससँगै विश्व फुटबलको महाकुम्भको औपचारिक सुरुवात हुनेछ।
फिफा विश्वकप इतिहासमै पहिलो पटक तीन राष्ट्रले संयुक्त रूपमा आयोजना गर्न लागेका हुन्। प्रतियोगिताका खेलहरू अमेरिका, मेक्सिको र क्यानडाका १६ सहरस्थित रंगशालाहरूमा सञ्चालन हुनेछन्। अमेरिकामा ११, मेक्सिकोमा ३ र क्यानडामा २ सहरले खेल आयोजना गर्नेछन्।
प्रतियोगिताको ढाँचामा पनि महत्वपूर्ण परिवर्तन गरिएको छ। ४८ टोलीलाई १२ समूहमा विभाजन गरिनेछ। प्रत्येक समूहका शीर्ष दुई टोली र तेस्रो स्थानमा रहने उत्कृष्ट ८ टोली नकआउट चरणअन्तर्गत नयाँ थप गरिएको राउन्ड अफ ३२ मा प्रवेश गर्नेछन्।
समूह चरण जुन ११ देखि २७ सम्म चल्नेछ भने त्यसपछि राउन्ड अफ ३२, राउन्ड अफ १६, क्वार्टरफाइनल, सेमिफाइनल र तेस्रो स्थानको खेल हुँदै जुलाई १९ मा फाइनल हुनेछ। क्वार्टरफाइनलका खेलहरू लस एन्जलस, कान्सास सिटी, मियामी र बोस्टनमा आयोजना हुनेछन् भने सेमिफाइनल डलास र एटलान्टामा हुनेछ।
यस विश्वकपको अर्को विशेषता भनेको केही नयाँ राष्ट्रहरूको सम्भावित ऐतिहासिक सहभागिता हो। प्रतियोगिताको विस्तारसँगै नयाँ देशहरूले विश्वकप मञ्चमा डेब्यु गर्ने अवसर पाएका छन्। साथै, सन् २०२२ को विश्वकप विजेता अर्जेन्टिना आफ्नो उपाधि रक्षा गर्ने लक्ष्यसहित मैदान उत्रनेछ।
मेक्सिको तेस्रो पटक विश्वकप आयोजना गर्ने पहिलो राष्ट्र बन्न लागेको छ भने एज्टेका स्टेडियमले तीन फरक विश्वकप (१९७०, १९८६ र २०२६) का खेल आयोजना गर्ने विश्वकै पहिलो रंगशालाको कीर्तिमान पनि बनाउनेछ।
सहभागी टोलीको संख्या, खेलको विस्तार, नयाँ ढाँचा र तीन राष्ट्रको संयुक्त आयोजनाका कारण फिफा विश्वकप २०२६ विश्व फुटबल इतिहासको सबैभन्दा स्मरणीय र ऐतिहासिक संस्करण बन्ने अपेक्षा गरिएको छ।
