काठमाडौं । राष्ट्रिय अनुसन्धान विभागका उपअनुसन्धान निर्देशक (एसपी) प्रकाश आचार्यसँगको विवाहेत्तर सम्बन्ध, आर्थिक लेनदेन र विद्युतीय माध्यमबाट धम्की दिएको आरोपमा पक्राउ परेकी ४६ वर्षीया कुसुम गुभाजुलाई जिल्ला अदालत काठमाडौंले पुर्पक्षका लागि थुनामा पठाएको छ।

जिल्ला प्रहरी परिसर काठमाडौंमा साउन २६ गते परेको जाहेरीका आधारमा भोलिपल्ट पक्राउ परेकी गुभाजुलाई भदौ २४ गते थुनछेक बहसपछि जिल्ला न्यायाधीश जगतबहादुर पौडेलको इजलासले पुर्पक्षका लागि थुनामा पठाउने आदेश गरेको हो।

गुभाजुविरुद्ध जिल्ला सरकारी वकिलको कार्यालय काठमाडौंले आपराधिक लाभ तथा विद्युतीय कारोबारसम्बन्धी कसुरमा अभियोगपत्र दायर गरेको छ। अभियोगमा मुलुकी अपराध संहिता, २०७४ को दफा २५३ तथा विद्युतीय कारोबार ऐन, २०६३ को दफा ४७ आकर्षित हुने दाबी गरिएको छ।

विवाहेत्तर सम्बन्धबाट सुरु भएको विवाद

प्रहरीमा परेको जाहेरीमै एसपी आचार्यले आफू र गुभाजुबीच माया–प्रेम तथा भेटघाट भएको र उनीहरूबीच विवाहेत्तर सम्बन्ध रहेको स्वीकार गरेका छन्।

गुभाजु भने नेपाली सेनामा कार्यरत गुरुङ थरका एक सैनिकसँग वैवाहिक सम्बन्धमा थिइन्। आचार्यसँगको सम्बन्धपछि पारिवारिक विवाद बढ्दै गएपछि उनले पतिसँग सम्बन्धविच्छेद गरेको विवरणमा उल्लेख छ।

गुभाजुको बयानअनुसार आचार्यले आफूलाई माया गर्ने, हेरचाह गर्ने तथा सहयोग गर्ने आश्वासन दिएका थिए। सम्बन्धविच्छेदपछि आचार्यले नै आफूलाई काठमाडौंमा कोठा खोजेर राखिदिएको उनको दाबी छ।

तर, पछि आचार्यले बेवास्ता गर्न थालेपछि आफूले रिसको आवेगमा विभिन्न म्यासेज पठाएको उनले बयानमा स्वीकारेकी छन्।

२७ लाख रुपैयाँको लेनदेन

सम्बन्धविच्छेदपछि आचार्यले गुभाजुलाई आर्थिक सहयोग गरेको देखिन्छ।

आचार्यबाट गुभाजुको बैंक खातामा एकपटक २० लाख रुपैयाँ र अर्कोपटक ७ लाख रुपैयाँ गरी कुल २७ लाख रुपैयाँ गएको विवरण प्रहरी अनुसन्धानमा समेटिएको छ।

अभियोगपत्रमा बैंकबाट प्राप्त कागजात तथा कारोबार विवरणलाई समेत प्रमाणका रूपमा समावेश गरिएको छ। अभियोजन पक्षले यही आर्थिक कारोबारलाई पनि मुद्दाको अनुसन्धानसँग जोडेको छ।

‘थप ५० लाख मागिन्’—आचार्यको आरोप

आचार्यले प्रहरीमा दिएको जाहेरीमा गुभाजुले आफूबाट थप ५० लाख रुपैयाँ मागेको आरोप लगाएका छन्।

उनका अनुसार उनीहरूबीच भएका निजी कुराकानी तथा भेटघाटका संवादका स्क्रिनसट सुरक्षित राखी त्यसलाई हतियार बनाएर आर्थिक लाभ लिन खोजिएको थियो।

जाहेरीमा विभिन्न मोबाइल नम्बर, फोन, म्यासेज तथा ह्वाट्सएपमार्फत रकम माग गर्दै रकम नदिए झुटा मुद्दामा फसाउने, जेल हाल्ने तथा ज्यान मार्नेसम्मका धम्की दिएको आरोप लगाइएको छ।

आचार्यले जाहेरीसँगै रकम माग तथा धम्कीसम्बन्धी केही स्क्रिनसटसमेत प्रहरीलाई उपलब्ध गराएका थिए।

गुभाजुको बयान : ‘ब्ल्याकमेलिङ गरेको होइन’

तर, गुभाजुले आचार्यले लगाएका मुख्य आरोप अस्वीकार गरेकी छन्।

उनका अनुसार आचार्यले नै फेसबुकमा फ्रेण्ड रिक्वेस्ट पठाएपछि उनीहरूबीच कुराकानी सुरु भएको थियो। सम्बन्ध गाढा हुँदै गएपछि तीजको समयमा कालु पाँडे डाँडा घुम्न गएको र त्यहाँ रात बिताएको उनको बयान छ।

त्यस घटनापछि आफ्नो पतिले आचार्यसँगको सम्बन्धबारे थाहा पाएर आफूलाई घरबाट निकालेको गुभाजुको दाबी छ। आचार्यले माया र हेरचाह गर्ने आश्वासन दिएपछि आफूले पतिसँग सम्बन्धविच्छेद गरेको उनको बयानमा उल्लेख छ।

आचार्यले भने कालु पाँडे डाँडामा गुभाजुसँग रात बिताएको दाबी अस्वीकार गरेका छन्।

सरकारी निवासदेखि प्रहरीसम्म

गुभाजुको बयानअनुसार आचार्यले पछि उनलाई भैरहवा लैजाँदा सरकारी निवासमा समेत राखेका थिए। गत वैशाखमा आचार्य काठमाडौं फर्किएपछि आफूलाई बेवास्ता गरेको भन्दै रिसको आवेगमा आफूले विभिन्न म्यासेज पठाएको उनले बताएकी छन्।

यही अवधिमा दुई पक्षबीच विवाद बढ्दै गएको र अन्ततः आचार्यले प्रहरीमा आपराधिक लाभ तथा विद्युतीय कारोबारसम्बन्धी जाहेरी दिएका हुन्।

कलंकीमा विवाद र प्रहरीमा सहमति

अनुसन्धानका क्रममा कलंकीस्थित एक रेस्टुरेन्टमा समेत दुई पक्षबीच विवाद भएको विवरण आएको छ।

विवादपछि दुवैलाई प्रहरीले नियन्त्रणमा लिएर छलफल गराएको र आगामी दिनमा झै–झगडा नगर्ने तथा एक–अर्कालाई दुःख नदिने सहमति गराएको कागजातसमेत अनुसन्धानमा समावेश गरिएको छ।

आपराधिक लाभ र विद्युतीय कारोबारको अभियोग

सरकारी वकिलको कार्यालयले गुभाजुविरुद्ध मुलुकी अपराध संहिताको दफा २५३ अन्तर्गत आपराधिक लाभको कसुरमा ३ वर्षसम्म कैद र ३० हजार रुपैयाँसम्म जरिवाना माग गरेको छ।

त्यसैगरी विद्युतीय कारोबार ऐन, २०६३ को दफा ४७ अन्तर्गत ५ वर्षसम्म कैद र १ लाख रुपैयाँसम्म जरिवाना मागदाबी गरिएको छ।

अभियोगपत्रमा बैंकिङ विवरण, प्रहरी अनुसन्धानका कागजात, बयान, स्क्रिनसट तथा अन्य अनुसन्धान सामग्रीलाई प्रमाणका रूपमा समेटिएको छ।

अदालतको आदेश : पुर्पक्षका लागि थुनामा

थुनछेक बहसपछि जिल्ला अदालत काठमाडौंले गुभाजुलाई पुर्पक्षका लागि थुनामा पठाउने आदेश गरिसकेको छ।

यसको अर्थ मुद्दाको अन्तिम फैसला भइसकेको भने होइन। अदालतले मुद्दाको अन्तिम सुनुवाइ र प्रमाणको मूल्याङ्कनपछि मात्र गुभाजु दोषी हुन् वा होइनन् भन्ने टुंगो लगाउनेछ।

अभियोजन पक्षले आचार्यको जाहेरी, आर्थिक कारोबार, डिजिटल प्रमाण तथा अन्य अनुसन्धान सामग्रीका आधारमा कसुर पुष्टि हुने दाबी गरेको छ भने गुभाजुले आफूले ब्ल्याकमेलिङ नगरेको र आचार्यसँगको सम्बन्ध तथा त्यसपछिको व्यवहारलाई फरक ढंगले व्याख्या गरेकी छन्।

यसकारण अहिलेको अवस्थामा ५० लाख रुपैयाँ मागेको आरोप, २७ लाख रुपैयाँको वास्तविक प्रयोजन, डिजिटल संवादको प्रकृति तथा दुई पक्षबीचको सम्बन्धमा भएको घटनाक्रम अदालतको अन्तिम परीक्षणको विषय बनेको छ।

आचार्य हाल सम्पत्ति जाँचबुझ आयोगमा काजमा रहेको बताइएको छ। घटना हुँदा उनी जिल्ला प्रशासन कार्यालय, रुपन्देहीमा कार्यरत थिए। गुल्मीका आचार्यले २०६७ सालमा अनुसन्धान अधिकृत (इन्स्पेक्टर)का रूपमा सेवा प्रवेश गरेका थिए र आफ्नै ब्याचबाट पहिलो लटमा एसपी भएका हुन्।